၁။ မွန် ၃-ရပ်နှင့် ပုသိမ်မြို့
ကျောက်စာလာစကားများအရလည်းကောင်း၊ ကျမ်းဂန်များအရလည်းကောင်း၊ မွန်တိ မွန်စ မွန်ည ဟူသော မွန်သုံးရပ်တို့ အချင်းချင်း အညမည ပေါင်းစပ်သောအားဖြင့် တိုင်းဖွဲ့အပ်သော ရာမညတိုင်းဟု နာမပညတ် သမုတ်အပ်သည့် -(က) တိဂုံ၊ ဒလ စသော ရာမညတိုင်း အစိတ် (မွန်တိ)
(ခ) သထုံ၊ မုတ္တမ စသော ရာမညတိုင်း အစိတ် (မွန်စ)
(ဂ) ပုသိမ်၊ မြောင်းမြ စသော ရာမညတိုင်း အစိတ် (မွန်ည)
တို့တွင် မွန်တိ မွန်စ ဟူသော တိဂုံ၊ ဒလ၊ သထုံ၊ မုတ္တမ တို့နှင့် အညမညဖြစ်သောကြောင့် (မွန်ည) ဖြစ်သော တိုင်းအစိတ်၏ ဗဟိုချက်ချာ မင်းစံရာ နေပြည်တော်၊ ကုသိမရဋ္ဌ ကုသိမနဂရ (ကုသိမ်-ကော့စမိန်) စသည်ဖြင့်၊ မွန်ဘာသာဖြင့် သမုတ်ခဲ့သော ယနေ့ပုသိမ်မြို့ပင်ဖြစ်သည်။
၂။ ပုသိမ်မြို့ကို အမည်အမျိုးမျိုး သတ်မှတ်ကြပုံ
အတိသဉ္ဇာမဂရ။ ။ ဘုရားအလောင်းတော် သူတော်ကောင်းတို့ မွေ့လျော်ရာ အဓိကရဌာန ဖြစ်ခဲ့ကြောင်းကို ရဟန္တာအရှင်မြတ်တို့ ညွှန်ပြအပ်သဖြင့် ပထမတွင် အတိသဉ္ဇနဂရ ဟုခေါ်တွင်ခဲ့သည်။ကုသိမရဋ္ဌ- ကုသိမနဂရ- ကုသိမ်မြို့။ ။ သာသနာသက္ကရာဇ် ၅၅၀-ပြည့်နှစ်တွင် သရေခေတ္တရာပြည်၊ ငတပါးမင်း၏ မြေးတော်ရန်မုက္ခမင်းလက်ထက် သီဟိုဠ်ကျွန်းတွင် ဒုမ္ဘိက္ခန္တရကပ်ကြီးဆိုက်သဖြင့် ရဟန္တာမြောက်မြားစွာတို့ ပုသိမ်သို့ ကြွရောက်လာရာ အချို့ကပုသိမ်မြို့တွင် သတင်းသုံးတော်မူကြ၍၊ များစွာသော ရဟန္တာအရှင်မြတ်များ သရေခေတ္တရာပြည် အရောက်ကြွရောက် သတင်းသုံးတော်မူကြသဖြင့် ရဟန္တာအရှင်မြတ်တို့ ကူးရောက်ရာ နိဗ္ဗာန်ကူးဆိပ်ဟု အဓိပ္ပါယ်ဖြင့် (ကုသိမရဋ္ဌ- ကုသိမနဂရ- ကုသိမ်မြို့) ဟုမှည့်ခေါ်ကြပြန်သည်။
ပုသိမနဂရ- ပုသိမ်မြို့။ ။ သက္ကရာဇ် ၅၃၃-ခုနှစ်တွင် ကုလားကျမင်းဟုအမည်တွင်ခဲ့သော မင်းယဉ်နရသိင်္ခ ပေါက္ကံပြည်ကို အုပ်စိုးစဉ်၊ ခမည်းတော်၏ရန်ဖက်ဖြစ်သော ပဋိက္ခရား ကုလားမင်းသည် ကုသိမရဋ္ဌမြို့ကို ခံမြို့အဖြစ်ဘုရင်ခံ အုပ်စိုးစေလျက်၊ မြို့ကိုအခိုင်အလုံ တည်ဆောက်ရာတွင် စစ်ရေးပြိုင်ရသည့်အခါနှင့် လျော်ကန်အောင် ဗေဒင်ကျမ်းကြီးအမျိုးမျိုးနှင့် ညှိနှိုင်းဝေဖန်ကာ၊ ရန်ဂြိုဟ်ဖြစ်သော (က) နှင့် (သ) မှ၊ ဥဒါသိန်မည်သော (ပ) နှင့် (သ) တို့၊ ပညာရှိ အစုံအလင်ပြင်ဆင်၍ သက္ကရာဇ် ၅၃၆- ခုနှစ်တွင် မော်ကွန်းစိုက်ထူကြောင်း၊ ရှေးစာဟောင်းရွှေတိုက်စစ်တမ်းတွင် ပါရှိသည့်အတိုင်း ကုသိမနဂရ- ကုသိမ် မှ ပုသိမနဂရ- ပုသိမ် သို့ပြောင်းလဲ ခေါ်ဝေါ်ခဲ့ကြသည်။
ပသီမြို့။ ။ သက္ကရာဇ် ၅၈၃ မှ ၅၉၅ ခုနှစ်အထိ ပုသိမ်ကိုအုပ်စိုးကြသော ကုလားမင်းများ လက်ထက်တွင် မူလအမည် ပုသိမ်မြို့မှ ပသီမြို့ဟု ပြောင်းလဲခေါ်ဝေါ်အုပ်စိုးခဲ့ကြသည်။
ပုသိမ်မြို့။ ။ ကုလားမင်းများကို တိုက်ခိုက်အောင်နိုင်၍ သက္ကရာဇ် ၅၉၅ မှ ၆၂၅ ခုနှစ်အထိ အုပ်စိုးခဲ့သော မွန်မင်းများ လက်ထက်တွင် ပသီမြို့အမည်ကို ဖျောက်၍ ပုသိမ်မြို့အမည်နှင့် ဆက်လက်အုပ်စိုးခဲ့ကြသည်။
နာဂဝုလ္လာ။ ။ တနည်းခေါ် နဂရဝေပုလ္လ။ သက္ကရာဇ် ၆၂၅ ခုနှစ်နောက်ပိုင်းတွင်၊ သာယာဝပြောမှုကို အကြောင်းပြု၍ ခေါ်သွင်ခဲ့ကြသည်။
ကော့သမိန်-ကော့စမိန် (cosmin)။ ။ သက္ကရာဇ် ၉၄၈ ခုနှစ်၊ ခရစ်သက္ကရာဇ် ၁၅၈၆ ခုနှစ် နိုဝင်ဘာလတွင် ပုသိမ်ရောက် အနောက်တိုင်းသားခရီးသည် (Ralf Fitch) ရပ်ဖစ်(ခ်ျ) ၏မှတ်တမ်းအရ၊ မွန်ဘာသာအခေါ် ကော့သမိန်ကို အနောက်တိုင်းသားအသံဖြင့် ကော့စမိန် (cosmin) ဟုခေါ်ဝေါ်ခဲ့ကြသည်။
သို့ရာတွင် ပုသိမ်ဟူသော အမည်မှာ အထင်အရှား အခိုင်အမာဆုံးဖြစ်၍၊ ယနေ့ထိဆက်လက် ခေါ်ဝေါ်လျက်ရှိသည်။
၃။ ပုသိမ်မြို့ကို နိဗ္ဗာန်ကူဆိပ်ဟု အမှတ်ပြုကြပုံ
(၁) သာသနာသက္ကရာဇ် ၅၅၀ ခုနှစ်တွင် သီဟိုဠ်မှ ရဟန္တာအရှင်မြတ်များ ပုသိမ်မြို့ကို ကြွလာတော်မူခဲ့ကြခြင်း။(၂) သာသနာသက္ကရာဇ် ၉၄၆ ခုနှစ်တွင် အရှင်မဟာဗုဒ္ဓဃောသသည် ပုသိမ်မြို့ (အသည်ကြီး ရွေးဗိုလ်တပ်အနီး) ဘင်္ဂလားသင်္ဘောဆိပ်မှ သီဟိုဠ်ကျွန်းသို့ကူး၍ စတုတ္ထသင်္ဂါယနာတင် သီဟဠဘာသာရေး ပေမူရင်း ပိဍကတ်တော်သုံးပုံကို မာဂဓဘာသာဖြင့် ပြန်ဆိုရေးကူး ပင့်ဆောင်တော်မူခဲ့ခြင်း။
(၃) သာသနာသက္ကရာဇ် ၁၇၁၅ ခုနှစ်၊ သက္ကရာဇ် ၅၄၂ ခုနှစ်တွင် ပုဂံဘုရင် နာရပတိစည်သူ၏ မင်းဆရာဖြစ်တော်မူသည့် သဒ္ဓမ္မဇောတိပါလမထေရ်မြတ်သည် ငယ်ရွယ်စဉ်အခါ ဆပဒသာမဏေ အမည်တော်ဖြင့် ဆရာဖြစ်သူ အရှင်ဥတ္တရဇီဝမထေမြတ်နှင့် အတူ ကုသိမ်မြို့(ပုသိမ်မြို့) သင်္ဘောဆိပ်မှ သီဟိုဠ်ကိုကူးတော်မူ၍၊ ပဉ္ဇင်းခံပြီး ပိဍကတ်ကျမ်းဂန်များကို သင်ကြားတတ်မြောက်ပြီးမှ ပုသိမ်ကိုသင်္ဘောဖြင့်ရောက်လာရာ ဝါဆိုကာနီးဖြစ်နေသဖြင့် ပုသိမ်မြို့တွင်ပင်ဝါဆိုပြီး၊ ဝါကျွတ်၍ ပဝါရဏာပြုပြီးမှ ပုဂံသို့ကြွတော်မူသည်။
(၄) သက္ကရာဇ် ၆၂၅ ခုနှစ်နောက်ပိုင်းတွင် ပုသိမ် ၃၂ မြို့သခင်သမုဒ္ဒဃောသ နှင့် ဥမ္မာဒန္တီတို့ လက်ထက်တွင် မြန်မာပြည်နှင့်သီဟိုဠ် ရဟန္တာအရှင်မြတ်များရော၊ လူဒါယကာများပါ ကူးခတ်သွားလာ သာသနာတော် အရောင်တောက်ပြောင် ယှက်ကူးစေခဲ့ခြင်း။
(၅) သက္ကရာဇ် ၇၉၁ ခုနှစ်၊ အင်းဝနန်းစံ သတိုးမင်းဖျားလက်ထက်တွင် သီဟိုဠ်ကျွန်းမှ အရှင်သီရိသုဓမ္မရာဇာဓိပတိနှင့် အရှင်သီရိသီဟဠမဟာသာမိ အရှင်နှစ်ပါးတို့သည် သရီရဓာတ်တော်စစ် ၅ ဆူနှင့်တကွ ပုသိမ်မြို့သို့သင်္ဘောနှင့် ကြွလာတော်မူခဲ့ခြင်း။
(၆) ရာမာဓိပတိဘွဲ့တော်ရသော ဓမ္မစေတီမင်းသည် မဇ္ဈိမတွင် ဗုဒ္ဓသာသနာတော် အခြေအနေ စုံစမ်းရေးအတွက် သက္ကရာဇ် ၈၄၃ ခုနှစ် ဝါခေါင်လဆန်း ၃ ရက်နေ့တွင် တစ်ကြိမ်။ ဥပသမ္ပဒကံ ယုံးမှားမရှိရအောင် သိမ်အဆုံးအဖြတ် စင်ကြယ်စေရေးအတွက် သီဟိုဠ်ကျွန်းသို့ သက္ကရာဇ် ၈၃၇ ခုနှစ်၊ တပို့တွဲလပြည့်ကျော် ၁၁ ရက်နေ့နှင့် ၁၂ ရက်နေ့များတွင် သင်္ဘောနှစ်စင်းနှင့် တစ်ကြိမ် ပုသိမ်ဆိပ်ကမ်းမှ သင်္ဘောစေလွှတ်ခဲ့ဖူးခြင်းတို့ကြောင့် နိဗ္ဗာန်ကူးဆိပ်ဟု အမှတ်ပြုခဲ့ကြ၏။
No comments:
Post a Comment
မိတ်ဆွေတို့၏ စကားတစ်ခွန်းဟာ ကျွန်တော်အတွက် အားဆေးတစ်ခွက်ပါ။